Paneli Craffu ar Benderfyniadau y Tu Allan i'r Llys

Penderfyniadau y Tu Allan i’r Llys i Oedolion a Phlant

Mae Arolygiaeth Cwnstabliaeth a Gwasanaethau Tân ac Achub Ei Fawrhydi yn diffinio Penderfyniadau y Tu Allan i’r Llys fel a ganlyn “Un o sawl dull o ddod â chamau gweithredu’r system cyfiawnder troseddol i ben mewn perthynas â throsedd heb fynd ymlaen i erlyniad. Cânt eu gweinyddu gan yr heddlu, a’u galluogi i ymdrin yn gyflym ac yn gymesur â throseddau lefel isel, sy’n aml yn rhai tro cyntaf.”

I gael rhagor o wybodaeth am Benderfyniadau y Tu Allan i’r Llys, dilynwch y ddolen isod:

Gwarediad y tu Allan i’r Llys | Heddlu De Cymru

Paneli Craffu ar Benderfyniadau y Tu Allan i’r Llys

Cynhelir Paneli Craffu ar Benderfyniadau y Tu Allan i’r Llys i oedolion a phlant bob chwarter. Mae’r Panel Craffu ar Benderfyniadau y Tu Allan i’r Llys i oedolion yn ardal Heddlu De Cymru wedi bod ar waith ers 2014. Mae Paneli Craffu ar Benderfyniadau y Tu Allan i’r Llys i blant ar wahân wedi bod yn cael eu datblygu ers 2021, ers cydnabod yr angen am baneli ar wahân sy’n canolbwyntio ar blant. Ar gyfer y paneli plant, cynhelir panel ar wahân ar gyfer pob Uned Reoli Sylfaenol i sicrhau y caiff achosion eu goruchwylio’n briodol ledled De Cymru.

Caiff pob panel ei gadeirio gan aelod annibynnol o’r panel i gryfhau annibyniaeth a thryloywder y broses graffu yn ystod cyfarfodydd panel.

Diben y Paneli

Dibyn y paneli yw penderfynu a yw’r dull a ddefnyddir ar gyfer Penderfyniadau y Tu Allan i’r Llys yn briodol, gan adolygu’r wybodaeth a’r dystiolaeth sydd a’r gael i’r unigolyn sy’n gwneud y penderfyniad ar y pryd. Mae’r panel yn ystyried categori’r drosedd, difrifoldeb y drosedd, y dystiolaeth sydd ar gael ar adeg y penderfyniad, y sail resymegol y tu ôl i broses gwneud penderfyniadau’r swyddog a ph’un a oedd y penderfyniadau yn canolbwyntio ar y dioddefwr. Mae’r paneli’n defnyddio dull sy’n canolbwyntio ar y person, gan gydnabod rhinweddau, profiadau ac anghenion yr oedolyn neu’r plentyn, yn ogystal â gwybodaeth berthnasol amdano wrth ystyried a yw’r penderfyniad yn briodol.

Proses y Paneli

Mae swyddfa’r Comisiynydd yn dewis sampl o achosion ar hap cyn cyfarfodydd y paneli. Caiff achosion eu dewis yn unol â thema’r panel y cytunwyd arni. Mae pob panel yn thematig a dewisir y themâu yn seiliedig ar dystiolaeth a data sydd ar gael. Ar gyfer paneli plant, trafodir a dewisir themâu yn ystod y Diwrnod Amlasiantaethol Ieuenctid, lle mae partneriaid a sefydliadau cyfiawnder ieuenctid yn dod ynghyd i drafod materion blaenoriaeth ym maes cyfiawnder ieuenctid a rhannu arfer da. Ar gyfer paneli oedolion, mae pob panel hefyd yn adolygu o leiaf tri achos sy’n cynnwys ymyrraeth Rhybuddio a Cham-drin mewn Perthynas (CARA). Mae CARA yn wasanaeth ymyrraeth gynnar a ddefnyddir ar gyfer troseddwyr cam-drin domestig sy’n cael Rhybuddiad Amodol. Nod CARA yw codi ymwybyddiaeth a helpu pobl i ddeall beth yw cam-drin domestig, ei effaith a’i ganlyniadau.

Caiff pob achos ei adolygu a’i drafod yn fanwl ac mae aelodau’n pleidleisio ynghylch y modd y cafodd pob achos ei ddatrys yn eu barn nhw fel a ganlyn:

1 = Yn briodol ac yn gyson â’r polisi

2 = Yn briodol â’r archwiliadau

3 = Yn amhriodol ac yn anghyson â’r polisi

4 = Panel wedi methu â dod i benderfyniad

Mewn achosion lle bydd y panel yn methu â dod i gasgliad, y Cadeirydd fydd yn gwneud y penderfyniad terfynol.

Aelodaeth o’r Paneli

Mae aelodaeth yn amrywio ar draws y Paneli Oedolion a Phlant ond mae’n cynnwys cynrychiolwyr o groestoriad o randdeiliaid mewnol ac allanol fel:

• Swyddfa Comisiynydd yr Heddlu a Throseddu
• Cadeirydd Mainc yr Ynadon
• Gwasanaeth Llysoedd a Thribiwnlysoedd Ei Fawrhydi
• Gwasanaeth Erlyn y Goron
• Erlynydd y Goron Rhanbarthol
• Gwasanaeth Cyfiawnder Ieuenctid
• Heddlu De Cymru
• Gwasanaethau Cyfiawnder De Cymru
• Gwasanaeth Carchardai a Phrawf Ei Fawrhydi
• Gwasanaethau Cymorth i Ddioddefwyr
• Gwasanaethau Cymorth Arbenigol

Adborth y Paneli

Caiff adborth o’r paneli ei rannu a’i uwchgyfeirio drwy strwythurau llywodraethu sefydledig er mwyn i Heddlu De Cymru a phartneriaid perthnasol weithredu arno. Caiff ei fwydo’n ôl i swyddogion a goruchwylwyr, ei ymgorffori mewn hyfforddiant i gefnogi dysgu traws-sefydliadol, a’i ddefnyddio i lywio gwaith datblygu polisi ehangach.

Caiff adroddiad blynyddol a ffeithluniau chwarterol eu cyhoeddi ar y wefan ar ôl pob panel a gellir dod o hyd iddynt isod.