Panel Craffu ar Ddalfeydd Annibynnol

Panel Craffu ar Ddalfeydd Annibynnol

Yn 2022, ysgrifennodd Cyngor Cenedlaethol Prif Swyddogion yr Heddlu (NPCC) a Chymdeithas Comisiynwyr yr Heddlu a Throseddu (APCC) at bob Comisiynydd yr Heddlu a Throseddu i awgrymu eu bod yn datblygu ‘panel craffu ar gadw yn y ddalfa’. Nododd NPCC ac APCC nad oedd dull gweithredu cyson o ymdrin ag anghymesuredd o fewn proffiliau cadw. Y gobaith yw y bydd sefydlu panel o’r fath yn helpu i feithrin ymddiriedaeth a hyder yn y maes hwn o blismona sy’n aml yn gudd.

O ganlyniad, sefydlwyd Panel Craffu ar Ddalfeydd Annibynnol De Cymru ar y cyd gan Gomisiynydd yr Heddlu a Throseddu De Cymru a Heddlu De Cymru. Mae’r aelodau yn cynnwys y bobl sy’n cynrychioli’r canlynol:

• Gwirfoddolwyr Annibynnol â’r Ddalfa
• Grŵp Atebolrwydd a Dilysrwydd yr Heddlu
• Grŵp Cynghori Annibynnol

Yn dilyn adolygiad o’r panel ac awgrym yn Siarter Plismona Plant a Phobl Ifanc 2025, mae’r panel chwarterol yn amrywio rhwng canolbwyntio ar blant ac oedolion yn y ddalfa. Mae hyn yn golygu bod y panel yn craffu ar achosion sy’n ymwneud â phlant yn y ddalfa ddwywaith y flwyddyn ac oedolion yn y ddalfa ddwywaith y flwyddyn, bob yn ail.

Diben y Panel Craffu ar Ddalfeydd Annibynnol

• Darparu goruchwyliaeth annibynnol bellach o fewn cadw a’r ddalfa.
• Asesu a rhoi gwybod am y prosesau cadw a’r ddalfa.
• Adolygu’n annibynnol ac ymgynghori ar faterion anghymesuredd o fewn y prosesau cadw a’r ddalfa.
• Helpu i feithrin ymddiriedaeth a hyder o fewn y gymuned drwy greu tryloywder o fewn cadw a’r ddalfa.
• Gweithredu fel ffrind beirniadol i Heddlu De Cymru a rhoi cyngor, canllawiau ac argymhellion i wella perfformiad mewn perthynas â chadw a’r ddalfa.

Bydd y Panel yn cael mynediad digynsail at ddeunydd a gadwyd gan yr heddlu er mwyn adolygu materion anghymesuredd ac ymddygiad yr heddlu/yr unigolyn sydd yn y ddalfa yn wrthrychol ac yn annibynnol yng nghyd-destun deddfwriaeth, canllawiau, polisi, a gweithdrefn. Noder na fydd data personol a sensitif ar gael i’r Panel.

Bydd y pynciau yn cynnwys y canlynol (ond heb fod yn gyfyngedig iddynt):

• Noeth-chwiliadau
• Dillad gwrth-rwygo
• Defnydd o rym
• Urddas a pharch
• Mynediad at wasanaethau (e.e. darpariaethau gwasanaethau iaith)
• Iechyd meddwl

Adborth y Paneli

Caiff adborth o’r paneli ei rannu a’i uwchgyfeirio drwy strwythurau llywodraethu sefydledig er mwyn i Wasanaethau Dalfeydd Heddlu De Cymru a phartneriaid perthnasol weithredu arno. Mae’n cael ei drosglwyddo i swyddogion a goruchwylwyr, ei gynnwys mewn hyfforddiant, a’i ddefnyddio i lywio datblygu polisïau a gweithdrefnau ehangach ar gyfer y ddalfa.

Caiff ffeithluniau chwarterol eu cyhoeddi ar y wefan ar ôl pob panel a gellir dod o hyd iddynt isod.