Lansio Cynllun Trais yn Erbyn Menywod, Cam-drin Domestig a Thrais Rhywiol (VAWDASV) ar y Cyd De Cymru

Cynllun Trais yn Erbyn Menywod, Cam-drin Domestig a Thrais Rhywiol ar y Cyd

Cynllun Heddlu Troseddu a Chyfiawnder De Cymru (2025-29), Blaenoriaeth 3: Diogelu Pobl a Chymunedau Sy’n Agored i Niwed, gan gynnwys Ar lein i gadw pobl a chymunedau sy’n agored i niwed yn ddiogel rhag achosion o gamfanteisio a niwed.

Cynllun ar Dudalen

Wrth ddatblygu fy Nghynllun Heddlu, Troseddu a Chyfiawnder (CHTCh), gwnaethoch ddweud wrthym fod mynd i’r afael â Thrais yn Erbyn Menywod a Merched (VAWG) yn bwysig i chi. Rwy’n ymrwymedig i weithio gyda phartneriaid i ddatblygu Cynllun Trais yn Erbyn Menywod, Cam-drin Domestig a Thrais Rhywiol (VAWDASV) ar y cyd ac mae’n bleser gennyf ei rannu yn awr. Mae’r Cynllun ar Dudalen hwn yn amlinellu’r camau y byddwn yn eu cymryd ar y cyd â Llywodraeth Leol a Llywodraeth Genedlaethol, Cyrff Anllywodraethol, Gwasanaethau Arbenigol, Asiantaethau Cyfiawnder Troseddol, Sefydliadau Iechyd ac Addysgol.

Rhennir y Cynllun yn bedair adran, sef y ‘Pedwar P’:

Paratoi: Paratoi timau plismona a phartneriaid i ymateb yn effeithiol i VAWG a’i leihau. Sicrhau bod timau plismona yn meddu ar y galluoedd, y capasiti a’r diwylliant cywir (gwybodaeth, sgiliau, cymorth a mewnwelediad) i ymdrin â VAWG.
Diogelwch (Protect): Diogelu a chefnogi dioddefwyr a chymunedau rhag pob math o VAWG.
Ymlid (Pursue): Deall sbardunau cyflawni troseddau yn well ac ymateb yn briodol drwy ddull system gyfan.
Atal (Prevent): Defnyddio dull ‘Atal yn Gyntaf’ o ymdrin â sbardunau VAWG, gan gynnig cyfleoedd i hyrwyddo cydberthnasau iach ac ymddygiadau cadarnhaol.

Wrth gwblhau’r Cynllun hwn, gwnaethom ymgynghori â dioddefwyr-goroeswyr VAWDASV, a gwasanaethau arbenigol, gan sicrhau bod y lleisiau pwysicaf a mwyaf dylanwadol yn cael eu clywed a’u hystyried yng nghynnwys ac addewidion y Cynllun hwn.

“Heddiw, Mawrth 30, rwy’n lansio fy Nghynllun VAWDASV ar y Cyd, sef cynllun cyflawni a rennir, a ddatblygwyd ar y cyd â phartneriaid ledled De Cymru. Fel eich Comisiynydd yr Heddlu a Throseddu (CHTh), mae trais yn erbyn menywod a merched yn parhau i fod yn flaenoriaeth i mi, ac rwy’n gobeithio y bydd y Cynllun hwn yn cyfrannu at ein cenhadaeth barhaus i roi terfyn ar drais yn erbyn menywod a merched. Mae’r Cynllun yn nodi’r camau y byddwn yn eu cymryd gyda’n gilydd i ddiogelu a chefnogi dioddefwyr pob math o VAWDASV, yn unol â’r addewid yn fy Nghynllun Heddlu, Troseddu a Chyfiawnder 2025-29. O gryfhau ymatebion amlasiantaethol a gwella profiadau dioddefwyr, i atal ymddygiadau niweidiol ac ymgysylltu â phobl ifanc, mae’r Cynllun hwn yn cynrychioli ein hymrwymiad ar y cyd i sicrhau newid ystyrlon, parhaus ym mhob rhan o’n rhanbarth. Hoffwn ddiolch i bawb sydd wedi cydweithio â mi ar bob cam o ddatblygiad y Cynllun hwn ac sy’n ymroddedig i’r nod a rennir o greu De Cymru Ddiogel, Cyfiawn a Chynhwysol y mae pob un ohonom ei eisiau a’i angen.” – CHTh Emma Wools

You can read the Joint VAWDASV Plan on a Page here: Cynllun Trais yn Erbyn Menywod, Cam-drin Domestig a Thrais Rhywiol ar y Cyd De Cymryu – Comisiynyddd yr Heddlu a Throseddau

Rydym wedi datblygu rhestr o dermau sy’n gysylltiedig â VAWDASV fel y cyfeirir atynt yn y Cynllun, y gellir ei gweld yma: Rhestr Termau Trais yn Erbyn Menywod a Merched a Diogelu – Comisiynyddd yr Heddlu a Throseddau

Gallwch ddarllen y Cynllun Heddlu, Troseddu a Chyfiawnder yma: Cynllun HTC

Gallwch ddarllen y Cynllun Heddlu, Troseddu a Chyfiawnder i Blant a Phobl Ifanc yma: Cynllun HTC i BPI

Cyfeiriadur Dioddefwyr

Os ydych chi neu rywun rydych yn ei adnabod wedi dioddef trais, mae cymorth ar gael gan wasanaethau cymorth cenedlaethol a lleol. Ceir gwybodaeth am y gwasanaethau hyn a sut i gysylltu â nhw yn y Cyfeiriadur Dioddefwyr.

Cyfeiriadur Dioddefwyr