Edrych yn ôl ar Fenter Strydoedd Mwy Diogel yr Haf

Edrych yn ôl ar Fenter Strydoedd Mwy Diogel yr Haf

Yn ôl ym mis Mehefin, lansiodd Comisiynydd yr Heddlu a Throseddu, Emma Wools, Fenter Strydoedd Mwy Diogel yr Haf – sef menter atal troseddu ac ymddygiad gwrthgymdeithasol yng nghanol trefi ledled De Cymru dros fisoedd yr haf.

Fe’i comisiynwyd gan yr Ysgrifennydd Cartref a’i chefnogi gan Gronfa Hotspot Action y Swyddfa Gartref. Datblygodd y Comisiynydd gynllun cyflawni o raglenni gorfodi’r heddlu wedi’u targedu a gweithgareddau partneriaeth sy’n cyd-fynd â blaenoriaethau’r Cynllun Heddlu, Troseddu a Chyfiawnder.

Rhwng mis Mehefin a mis Medi, ymwelodd y Comisiynydd â mannau problemus a chanol trefi ledled De Cymru i gwrdd â phartneriaid, i siarad â thrigolion a busnesau ac i gael dealltwriaeth o effaith y fenter hon ar gymunedau lleol.

Dywedodd y Comisiynydd:

“Mae pawb yn haeddu cael teimlo’n ddiogel yn eu cymunedau ac yng nghanol eu trefi. Dros y misoedd diwethaf, rwyf wedi gweld Menter Strydoedd Mwy Diogel yr Haf yn dod â phartneriaid ynghyd i gyflawni mentrau sy’n adfer ymddiriedaeth mewn plismona cymunedol a diogelwch mewn cymunedau lleol.”

Drwy gydol yr haf, mae cyllid Menter Strydoedd Mwy Diogel yr Haf wedi cefnogi’r gwaith o gyflawni dull wedi’i dargedu sy’n seiliedig ar le o leihau troseddu ac ymddygiad gwrthgymdeithasol yn ein trefi a’n dinasoedd drwy’r canlynol:

• Gweithgareddau allgymorth ac ymyrryd yn gynnar i bobl ifanc
• Cynyddu gwelededd a phresenoldeb yr heddlu
• Gwella seilwaith diogelwch a diogelu
• Ymgysylltu â manwerthwyr penodedig

Ychwanegodd y Comisiynydd:

“Mae pwysigrwydd gwaith partneriaeth ataliol wedi cael ei bwysleisio yn yr effaith a gafwyd eisoes dros gyfnod yr haf. Mae mynd i’r afael ag achosion sylfaenol troseddu, a chefnogi cymunedau lleol yn hanfodol i weithio tuag at greu De Cymru ddiogel, gyfiawn a chynhwysol”