Comisiynydd yr Heddlu a Throseddu De Cymru yn ariannu ymgyrch ‘Jog On’ i fynd i’r afael ag aflonyddu ar y stryd ac annog riportio

Comisiynydd yr Heddlu a Throseddu De Cymru yn ariannu ymgyrch ‘Jog On’ i fynd i’r afael ag aflonyddu ar y stryd ac annog riportio

Mae’r Comisiynydd wedi ymrwymo i amddiffyn pobl a chymunedau sy’n agored i niwed, gan sicrhau eu bod yn teimlo’n ddiogel, bod cymorth yno iddyn nhw ac yn hyderus i riportio pryderon.

Mae’r ymrwymiad hwnnw wedi’i atgyfnerthu drwy fuddsoddi yn yr ymgyrch ‘Jog On’, sydd â’r nod o fynd i’r afael â’r aflonyddu a brofir gan redwyr benywaidd ac annog mwy o bobl i riportio digwyddiadau.

Mae’r ymgyrch yn dilyn arolwg a gynhaliwyd gan Heddlu De Cymru, a ddarganfu bod mwy na dwy ran o dair o redwyr benywaidd yn ne Cymru wedi profi rhyw fath o aflonyddu ar y stryd wrth ymarfer corff. Dywedodd llawer ohonynt fod y profiadau hyn yn effeithio ar ba mor ddiogel roedden nhw’n teimlo, a gwnaeth rhai newid eu llwybrau rhedeg, newid yr hyn roedden nhw’n ei wisgo, neu ddewis peidio â rhedeg ar eu pennau eu hunain.

Mewn ymateb, mae’r ymgyrch ‘Jog On’ yn cyflwyno neges glir bod unrhyw fath o aflonyddu yn annerbyniol a bydd yn cael ei gymryd o ddifrif pan gaiff ei riportio.

Ochr yn ochr â chodi ymwybyddiaeth, ategir yr ymgyrch gan waith parhaus Heddlu De Cymru gyda chymunedau lleol, gan gynnwys ymgysylltu mewn digwyddiadau parkrun, clybiau rhedeg a mentrau sy’n hyrwyddo diogelwch menywod mewn chwaraeon. Bydd swyddogion yn annog riportio digwyddiadau, yn gwrando ar brofiadau rhedwyr ac yn cefnogi pobl i fynd ati i gamu i’r adwy pan fyddant yn dyst i ymddygiad amhriodol.

Drwy weithio ar y cyd, nod yr ymgyrch yw helpu i sicrhau bod pawb yn gallu mwynhau rhedeg ac ymarfer corff yn ddiogel, yn hyderus ac heb aflonyddu.

Beth yw aflonyddu yn y cyd-destun hwn?

Ymddygiad digroeso sy’n bygwth neu’n codi ofn ar fenywod sy’n rhedeg ac yn loncian yn gyhoeddus. Mae’r rhain yn fwy nag ymddygiadau digroeso – yn aml, troseddau ydyn nhw. Gall ymddygiadau gynnwys:

• Cilwenu neu syllu’n barhaus -edrych ar rywun mewn ffordd ddigroeso, ffordd sy’n codi ofn neu ffordd rywiol.
• Heclo/chwibanu – sylwadau rhywiol digroeso, ystumiau a chwibanu, yn aml i godi ofn ar y dioddefwr.

Felly beth yw’r ymgyrch JogOn?

Mae JogOn yn ymgyrch sydd â’r nod o fynd i’r afael â’r aflonyddu y mae menywod yn ei wynebu wrth redeg a loncian, drwy godi ymwybyddiaeth i annog riportio ac atal digwyddiadau, hyfforddiant i annog tystion i fynd ati i gamu i’r adwy, a gorfodi’r heddlu i gymryd camau yn erbyn cyflawnwyr aflonyddu parhaus.

Felly pam mae angen JogOn yn ne Cymru?

Mae arolwg gan Heddlu De Cymru wedi dangos effaith aflonyddu ar y stryd ar fenywod a merched wrth loncian neu redeg.

Mae’r canlyniadau wedi ein hysbysu bod 68% (117) o redwyr benywaidd a ymatebodd i’r arolwg wedi profi aflonyddu ar y stryd neu ymddygiad camdriniol wrth gymryd rhan yn eu hobi gan gynnwys heclo ac ymosodiadau corfforol neu rywiol.

Beth yw manteision JogOn i fenywod?

Mae menywod yn newid eu llwybrau a’u harferion, yn rhoi’r gorau i’w hobi o redeg neu loncian, nid ydynt bellach yn rhedeg ar eu pennau eu hunain nac yn rhannu lleoliadau â theulu a ffrindiau, maent yn gwisgo dillad gwahanol, yn osgoi gwrando ar gerddoriaeth i atal aflonyddu a cheir ymosodiadau corfforol a rhywiol hyd yn oed. Mae’r ymddygiadau hyn, dim ond i gadw’n heini a theimlo’n ddiogel yn eu cymunedau eu hunain, yn ffordd annerbyniol o fyw. Ein nod yw de Cymru lle gall pawb ymarfer eu hobïau yn ddiogel heb boeni – ni waeth beth fo amser y dydd neu’r mis o’r flwyddyn.

Beth yw manteision JogOn i bawb?

Nid oed modd mynd i’r afael ag aflonyddu ar wahân. Bydd angen i ni i gyd sefyll i fyny a newid yr ymddygiadau niweidiol hyn drwy addysg a chodi ymwybyddiaeth. Dim ond dechreuad yw JogOn i glybiau rhedeg ledled de Cymru, ond doed dim rhaid bod yn rhan o glwb, na rhedeg neu loncian yn aml, gallwch chi feddwl – JogOn.

Rhowch wybod i ni

Os ydych chi’n destun unrhyw fath o aflonyddu, cysylltwch â Heddlu De Cymru:

• Ar-lein: Riportio ar-lein (allanol)
• Ffôn: 101

Os ydych chi mewn perygl uniongyrchol, ffoniwch 999 bob tro.

Os nad ydych chi’n dymuno siarad â’r heddlu, gallwch hefyd gysylltu ag elusen annibynnol Crimestoppers yn ddienw ar-lein (allanol) neu drwy ffonio 0800 555 111.

Rydym yn gwybod y gall y troseddau hyn effeithio ar unrhyw un a bydd pawb sy’n riportio yn cael eu cymryd o ddifrif, ond y dystiolaeth aruthrol yw bod menywod a merched yn fwyaf tebygol o gael eu targedu a dyna pam rydym yn mynd i’r afael â’r mater yn y modd hwn