Creu cyfleoedd cadarnhaol i bobl ifanc ledled Caerdydd

Mae pobl ifanc yn Butetown a chymunedau cyfagos wedi cael budd o raglen dros yr haf sydd â’r nod o ddod â phobl ynghyd, cryfhau cysylltiadau cymunedol a darparu cyfleoedd cadarnhaol drwy chwaraeon, gweithgareddau a mentrau ymgysylltu â phobl ifanc.

Wedi’i hariannu gan Gomisiynydd yr Heddlu a Throseddu De Cymru drwy’r Uned Atal a Lleihau Trais, mae Foundation4SportCardiff a Chlwb Bocsio Amatur Tiger Bay wedi cyflwyno’r rhaglen ‘Nosweithiau’r Haf’, sy’n cynnig sesiynau gyda’r nos i bobl ifanc rhwng 13 a 23 oed am ddim drwy gydol yr haf.

Drwy gynnal sesiynau dair noson yr wythnos ym Mhafiliwn Butetown o ddiwedd mis Mehefin i fis Medi, mae’r rhaglen wedi cynnig lle croesawgar a chynhwysol i bobl ifanc o Butetown, Grangetown, Treganna ac ardaloedd cyfagos gymryd rhan mewn amrywiaeth o weithgareddau ategol, gweithdai sgiliau bywyd, a mentrau cymunedol ochr yn ochr ag oedolion dibynadwy.

Roedd y sesiynau yn hynod boblogaidd ymhlith pobl ifanc, gan ddenu mwy na 70 o unigolion bob nos yn rheolaidd. Drwy gynnig gweithgareddau strwythuredig gyda’r nos, llwyddodd y rhaglen i greu cyfleoedd i bobl ifanc gadw’n heini, magu hyder, datblygu sgiliau newydd a meithrin ymdeimlad cryf o berthyn yn eu cymunedau.

Un o brif nodweddion y rhaglen oedd yr ymgysylltu cadarnhaol rhwng pobl ifanc a thimau plismona lleol. Trwy sgyrsiau anffurfiol a gweithgareddau ar y cyd, cafodd pobl ifanc gyfle i gwrdd â chynrychiolwyr Plismona yn y Gymdogaeth mewn amgylchedd hamddenol, gan helpu i feithrin cyd-ddealltwriaeth a gwella hyder mewn plismona lleol.

Yn ystod ymweliad diweddar, cyfarfu Comisiynydd yr Heddlu a Throseddu Emma Wools â phobl ifanc, staff, a gwirfoddolwyr i glywed yn uniongyrchol am y gwahaniaeth mae’r rhaglen wedi’i wneud. Siaradodd pobl ifanc am yr ymdeimlad cryf o gymuned a gafodd ei fagu drwy’r sesiynau mewn ffordd gadarnhaol, ynghyd â’r perthnasoedd cefnogol roedden nhw wedi’u datblygu gyda hyfforddwyr. Wrth ddisgrifio’r rhaglen, dywedant ei bod yn rhywle lle roedden nhw’n teimlo eu bod yn cael eu croesawu a’u gwerthfawrogi, ac yn rhywle y gallan nhw fod yn nhw eu hunain.

Mae’r rhaglen yn rhan o ymrwymiad ehangach gan Gomisiynydd yr Heddlu a Throseddu i fuddsoddi mewn mentrau cymunedol sy’n rhoi cyfleoedd cadarnhaol i bobl ifanc, yn cryfhau cydberthnasau lleol, ac yn helpu i greu cymunedau cryfach a mwy diogel.

Gan fyfyrio ar yr ymweliad, dywedodd Comisiynydd yr Heddlu a Throseddu Emma Wools:

“Mae llwyddiant Nosweithiau’r Haf yn dangos gwerth amhrisiadwy rhaglenni cymunedol sy’n creu cyfleoedd i bobl ifanc ddod at ei gilydd, cadw’n heini a theimlo’n rhan o’u cymunedau lleol. Roedd clywed pobl ifanc yn trafod effaith gadarnhaol y sesiynau hyn yn ysbrydoledig, a gwnaethant sôn hefyd am y ffrindiau maen nhw wedi’u gwneud, faint o hyder sydd ganddynt bellach, a’r profiadau maen nhw wedi’u mwynhau drwy gydol yr haf.

Diolch i ymroddiad Foundation4Sport, Clwb Bocsio Amatur Tiger Bay a sefydliadau tebyg eraill, llwyddwyd i greu profiadau a chyfleoedd ystyrlon i bobl ifanc. Drwy fuddsoddi mewn rhaglenni fel yr un yma, rydym yn helpu i atgyfnerthu cysylltiadau cymunedol, meithrin ymddiriedaeth a sicrhau bod gan bobl ifanc fynediad at gyfleoedd cadarnhaol lle gallan nhw ffynnu.”