Menter Strydoedd Mwy Diogel yr Haf

Menter Strydoedd Mwy Diogel yr Haf

Mae Comisiynydd Heddlu a Throseddu De Cymru, Emma Wools, wedi lansio Menter Strydoedd Mwy Diogel yr Haf – rhaglen o gamau gorfodi a gweithgareddau partneriaeth penodol wedi’u cynllunio i fynd i’r afael ag ymddygiad gwrthgymdeithasol, troseddau manwerthu a thrais ar y strydoedd mewn 10 ardal canol y dref lle ceir problemau mynych yn Ne Cymru dros fisoedd yr haf.

Mae’r Ysgrifennydd Cartref wedi ysgrifennu at bob Comisiynydd Heddlu a Throseddu yn gofyn iddynt arwain cynlluniau cyflawni lleol i gefnogi uchelgais Strydoedd Mwy Diogel y Llywodraeth yn ystod misoedd prysur yr haf. Yn Ne Cymru, mae’r Comisiynydd wedi llunio cynllun cyflawni ar ran partneriaid lleol sy’n gydnaws â Chynllun yr Heddlu, Troseddu a Chyfiawnder 2025-2029, sy’n adlewyrchu ei chred y dylid gweithredu mewn ffordd sy’n seiliedig ar le ac o dan arweiniad partneriaethau er mwyn creu ardaloedd canol tref mwy diogel.

Gyda chymorth Cronfa Hotspot Action y Swyddfa Gartref, mae’r Comisiynydd wedi gweithio gyda’r Uned Atal a Lleihau Trais, timau heddlu lleol a phartneriaid i ddatblygu ymyriadau wedi’u targedu. Mae’r dull hwn yn adlewyrchu uchelgais y Comisiynydd i weithio gyda busnesau, awdurdodau lleol a phartneriaid cymunedol i leihau troseddau manwerthu a sicrhau bod ardaloedd canol tref yn fwy diogel i bawb.

Dywedodd y Comisiynydd:

“Mae gan y cyhoedd yr hawl i deimlo’n ddiogel yn eu cymunedau ac yng nghanol ein trefi yn ystod cyfnod prysur yr haf. Nod Menter Strydoedd Mwy Diogel yr Haf yw dod â phartneriaid ynghyd – nid dim ond dibynnu ar yr awdurdodau gorfodi – er mwyn mynd i’r afael â materion parhaus sy’n niweidio ein cymunedau ac yn lleihau hyder. Hoffwn ddiolch i’r timau heddlu lleol, yr awdurdodau lleol, y partneriaid diogelwch cymunedol, y gymuned fusnes, ac yn arbennig yr Ardaloedd Gwella Busnes, am gydweithio i sicrhau y gallwn gyflawni canlyniadau go iawn.”

Mae Menter Strydoedd Mwy Diogel yr Haf yn seiliedig ar ddatrys problemau lleol, ac mae cyllid yn cefnogi mentrau sy’n cynnwys y canlynol:

• Patrolau allgymorth ac ymyrryd yn gynnar estynedig i bobl ifanc
• Mesurau i bennu targedau mwy llym mewn lleoliadau a nodwyd fel mannau problemus
• Gwaith penodol i ymgysylltu â busnesau ac atal troseddau
• Presenoldeb gweledol swyddogion yr heddlu ac asiantaethau partner mewn lifrau

Yn 2024/25, cyflawnodd cyllid drwy’r Gronfa Hotspot Action ganlyniadau mesuradwy ledled De Cymru, gan gynnwys gostyngiad o 15% mewn trais ac ymddygiad gwrthgymdeithasol, a gostyngiad o 19% mewn niwed yn y mannau problemus a dargedwyd.

Ychwanegodd y Comisiynydd:

“Rydym yn gwybod bod y dull hwn yn gweithio. Eleni, rydym yn parhau â’n buddsoddiad i wella gwelededd yr heddlu, ond rydym hefyd yn cefnogi datrysiadau o dan arweiniad partneriaethau sy’n gwella hyder, yn mynd i’r afael ag achosion sylfaenol troseddu, ac yn cefnogi ein busnesau lleol.”

Yn ystod yr haf, bydd y Comisiynydd yn ymweld â mannau problemus a chanol trefi i gwrdd â phartneriaid, siarad â phreswylwyr a busnesau, a rhannu’r wybodaeth ddiweddaraf am effaith y gwaith hwn a chyfleoedd pellach i ymgysylltu â chymunedau