Gwiriwch cyn prynu. Byddwch yn sicr cyn gyrru.

Gall beiciau trydan ac e-sgwteri edrych yn debyg i’w gilydd. Ond mae’r rheolau ynghylch yr hyn sy’n gyfreithlon, ble gellir eu defnyddio, a phwy sy’n gallu eu gyrru yn wahanol.

Os ydych chi’n ystyried prynu beic trydan neu e-sgwter i’ch hun neu i’ch plentyn, gwiriwch beth rydych chi’n ei brynu cyn gwario eich arian.

Er bod modd i chi brynu’r eitemau hyn, nid yw hynny’n golygu ei bod hi’n gyfreithlon eu defnyddio’n gyhoeddus.

Gwybod y gwahaniaeth

Beic trydan cyfreithlon

Mae’n rhaid i feic pedal a gynorthwyir yn drydanol (EAPC):

  • feddu ar bedalau y gellir eu defnyddio i hwbio’r beic;
  • meddu ar fodur â phŵer graddedig parhaus nad yw’n fwy na 250 wat;
  • diffodd unrhyw gymorth trydanol unwaith y bydd y beic yn cyrraedd 15.5 mya.

Mae’n rhaid bod yn 14 oed neu’n hŷn er mwyn cael gyrru’r beiciau hyn ar ffyrdd cyhoeddus a llwybrau beicio.

Beiciau trydan sydd wedi’u haddasu neu nad ydynt yn cydymffurfio

Os oes beic trydan wedi cael ei addasu i’w wneud yn fwy pwerus neu i gynyddu ei gyflymder â chymorth trydanol, neu os nad yw’n cydymffurfio â’r gofynion cyfreithiol ar gyfer beiciau trydan, gellir ei ystyried yn gerbyd modur.

Mae’n bosibl y bydd rheolau gwahanol yn berthnasol yn yr achos hwnnw, gan gynnwys gofynion o ran cofrestru’r cerbyd, ei drwyddedu, trefnu yswiriant ar ei gyfer, a defnyddio cyfarpar diogelu.

E-sgwteri sy’n eiddo preifat

Mae’n anghyfreithlon reidio e-sgwteri preifat mewn man cyhoeddus, gan gynnwys ar y ffyrdd, y palmant, lonydd beicio neu mewn parciau cyhoeddus.

Dim ond gyda chaniatâd y tirfeddiannwr y gellir eu defnyddio ar dir preifat.

Ddim yn siŵr beth rydych chi’n ei brynu?

Yn ôl y gyfraith, efallai mopeds neu feiciau modur yw rhai beiciau pweredig sy’n edrych yn debyg i feiciau trydan. Holwch ynglŷn â chategori’r cerbyd cyn ei brynu neu ei ddefnyddio.

Ydych chi’n prynu i blentyn? Ystyriwch y pum pwynt isod:

  1. Beth yw e?

Nid yw beiciau sy’n cael eu gwerthu fel “beiciau trydan” bob amser yn rhai cyfreithlon. Ceisiwch fanylion am bŵer y modur, y cyflymder a gynorthwyir yn drydanol a’r pedalau, a gwnewch yn siŵr eich bod yn deall ac yn gwybod beth rydych chi’n ei brynu.

  1. Beth yw oedran y gyrrwr?

Mae’n rhaid bod yn 14 oed neu’n hŷn i ddefnyddio beic trydan cyfreithlon ar ffyrdd cyhoeddus a llwybrau beicio. Os ydych chi’n prynu i rywun o dan 14 oed, gwiriwch ble bydd hi’n bosibl defnyddio’r beic yn gyfreithlon cyn ei brynu.

  1. Ble gellir ei ddefnyddio?

Yn gyffredinol, gellir defnyddio beic trydan cyfreithlon mewn mannau lle caniateir defnyddio beiciau pedal confensiynol, ac eithrio palmentydd. Ni ellir defnyddio e-sgwteri preifat mewn mannau cyhoeddus yn gyfreithlon.

  1. Oes modd ei addasu?

Mae’n bosibl addasu rhai beiciau trydan i gynyddu eu cyflymder neu eu pŵer. Gall addasiadau o’r fath effeithio ar ba mor ddiogel yw’r beic ac a yw’n gyfreithlon ei ddefnyddio ar ffyrdd cyhoeddus. Eglurwch wrth eich plentyn fod rhaid cael caniatâd gennych cyn newid y beic mewn unrhyw ffordd.

  1. Beth fydd y canlyniadau?

Yn dibynnu ar y cerbyd a’r amgylchiadau, os defnyddir cerbyd mewn modd anghyfreithlon, gall yr heddlu gymryd camau gweithredu, atafaelu’r cerbyd, ac efallai y bydd canlyniadau cyfreithiol eraill. Gall rhai troseddau effeithio ar bobl ifanc wrth iddynt wneud cais am drwydded yrru yn y dyfodol hefyd.

Edrychwch ar y rheolau cyn gwario eich arian ar feic trydan neu e-sgwter – a chyn i’ch plentyn ei ddefnyddio.

Pobl ifanc: Byddwch yn sicr cyn gyrru.

Cyn defnyddio beic trydan neu e-sgwter, ystyriwch y canlynol:

  • O dan 14 oed? Chewch chi ddim gyrru beic trydan ar ffyrdd cyhoeddus na lonydd beicio.
  • Wedi ei fenthyg gan rywun? Mae’n rhaid gwybod a yw’r cerbyd yn gyfreithlon a ble gellir ei ddefnyddio.
  • Ydy’r beic wedi cael ei addasu i’w wneud yn gyflymach? Os oes rhywun wedi newid y cyflymder neu’r pŵer, efallai na fydd y beic yn gyfreithlon mwyach.
  • Yn defnyddio e-sgwter? Mae’n anghyfreithlon defnyddio e-sgwter preifat ar ffyrdd, palmentydd, lonydd beicio neu mewn parciau cyhoeddus.
  • Byddwch yn ymwybodol o’r canlyniadau. Gall yr heddlu atafaelu cerbyd sy’n cael ei ddefnyddio’n anghyfreithlon, ac mae’n bosibl y bydd rhai troseddau yn effeithio ar eich trwydded yrru – hyd yn oed os nad oes gennych un eto.

Nid pob beic sy’n gyfreithlon. Gwnewch yn siŵr eich bod chi’n gwybod pa fath o gerbyd rydych chi’n ei yrru, a gwiriwch y rheolau cyn mynd ati i wneud hynny.

Wedi ei fenthyg? Chi sy’n gyfrifol o hyd.

Byddwch yn sicr cyn gyrru.

Batris a diogelwch wrth wefru

Gall batris mewn beiciau trydan ac e-sgwteri achosi tanau difrifol os ydynt wedi cael eu difrodi neu os ydynt yn rhai anghydnaws, o ansawdd gwael neu’n cael eu defnyddio’n anghywir.

  • Prynwch gan fân-werthwyr ag enw da, a defnyddiwch y batris a’r gwefrwyr cywir.
  • Peidiwch byth â defnyddio batris na chyfarpar gwefru sydd wedi cael eu difrodi.
  • Cyfeiriwch at gyfarwyddiadau’r gwneuthurwr a pheidiwch â gwefru beiciau trydan ac e-sgwteri os oes posibilrwydd y gallai tân rwystro’r allanfa.

Am ragor o gyngor, darllenwch y canllawiau swyddogol ar ddiogelwch batris isod.

Rhagor o wybodaeth

Defnyddiwch ganllawiau swyddogol a dibynadwy i wirio’r rheolau cyn prynu neu ddefnyddio beiciau trydan ac e-sgwteri:

Gwiriwch cyn prynu. Byddwch yn sicr cyn gyrru.