UALIT yn Ymuno ag Ymdrech Genedlaethol yng Nghynhadledd Rhaglen Lleihau Trais Difrifol y Swyddfa Gartref

Mynychodd Uned Atal a Lleihau Trais (UALlT) De Cymru Gynhadledd ddeuddydd y Rhaglen Lleihau Trais Difrifol yr wythnos diwethaf yn Llundain, gan ddod â phartneriaid allweddol o bob cwr o Gymru a Lloegr sy’n ymrwymedig i fynd i’r afael â thrais difrifol a gwella canlyniadau i bobl ifanc ynghyd.

Creodd y gynhadledd, a gynhaliwyd gan y Swyddfa Gartref, fan hollbwysig i randdeiliaid fyfyrio ar yr hyn a gyflawnwyd hyd yma, rhannu arferion gorau, a helpu i lywio rhaglen 2026/27 – gan sicrhau bod ymdrechion lleol a chenedlaethol yn parhau i ddatblygu yn unol ag anghenion cymunedau.

Diwrnod 1: Paneli Peilot Young Futures – Dysgu, Effaith a’r Camau Nesaf

 Canolbwyntiodd y diwrnod cyntaf ar wybodaeth o Baneli Peilot Young Futures, gan arddangos yr hyn a ddysgwyd ym Mlwyddyn 1 a llywio’r cyfeiriad ar gyfer Blwyddyn 2. Gwrandawodd y rhai a oedd yn bresennol ar gyfraniadau pwerus am y modd y mae ymyrraeth gynnar, llais ieuenctid a chydweithio amlasiantaethol yn gwella cyfleoedd bywyd. Ymunodd tîm yr UALlT â gweithdai yn archwilio’r hyn sy’n gweithio ar lawr gwlad a sut y gellir atgyfnerthu a datblygu tystiolaeth o’r cynlluniau peilot.

Roedd y Gweinidog dros Gyfiawnder a Phlismona, Sarah Jones hefyd yn bresennol ar y diwrnod, a gwnaeth ganmol effaith Unedau Lleihau Trais ar leihau trais ers iddynt gael eu sefydlu yn 2019. Pwysleisiodd hefyd yr angen i sicrhau bod atal yn parhau i fod yn flaenoriaeth ar y cyd ar lefel leol, ranbarthol a chenedlaethol.

Diwrnod 2: Cefnogi’r Broses o Gyflawni’r Rhaglen Ledled Cymru a Lloegr

 Canolbwyntiodd yr ail ddiwrnod ar sgyrsiau am y Rhaglen Lleihau Trais Difrifol ehangach, gan ganolbwyntio ar gefnogi ardaloedd lleol i’w chyflawni’n gyson ac yn hyderus. Drwy drafodaethau wedi’u hwyluso, bu modd i unedau lleihau trais, partneriaid plismona, awdurdodau lleol ac arbenigwyr yn y sector rannu heriau, archwilio datrysiadau, ac atgyfnerthu dulliau ar y cyd. Cyfrannodd yr UALlT at sesiynau yn canolbwyntio ar roi rhaglenni atal yn seiliedig ar le effeithiol ar waith, gwella prosesau gwneud penderfyniadau yn seiliedig ar ddata, a manteisio ar gydweithio i leihau niwed.

Ysgogi Dulliau Atal Trais

 Atgyfnerthodd y gynhadledd bwysigrwydd dulliau amlasiantaethol. Rhoddodd y ddau ddiwrnod wybodaeth ffres a momentwm newydd i UALlT De Cymru wrth i ni barhau i gydweithio i leihau trais a chreu cymunedau mwy diogel i bawb.