Tribiwnlysoedd Apeliadau'r Heddlu

Gwrandawiadau Camymddwyn yr Heddlu

O dan Reoliadau yr Heddlu (Ymddygiad) (Diwygio) 2024, gwnaed newidiadau i gyfansoddiad gwrandawiadau camymddwyn yr heddlu ar gyfer swyddogion yr heddlu o radd Uwch-arolygydd ac is. Diben y newidiadau oedd rhoi mwy o gyfrifoldeb i Brif Gwnstabliaid yn y broses ddisgyblu, gan gynnwys penderfynu a ddylid diswyddo swyddog ai peidio. Cyflwynwyd yr arfer o gynnal gwrandawiadau yn gyhoeddus ym mis Mai 2015 ac o fis Mai 2024, Prif Swyddogion fydd yn gyfrifol am gadeirio gwrandawiadau camymddwyn ond gallant ddirprwyo’r ddyletswydd hon i Uwch-swyddog arall.

Ceir manylion am wrandawiadau camymddwyn ar wefan Heddlu De Cymru – cliciwch yma.

Gwrandawiadau Camymddwyn yn Ne Cymru, Gwent, Dyfed Powys a Gogledd Cymru 

Cynhelir gwrandawiadau gan Banel Camymddwyn yr Heddlu (y panel), sy’n cynnwys y Cadeirydd a dau Aelod Panel Annibynnol. Caiff y panel ei gynghori gan Berson â Chymwysterau Cyfreithiol a benodwyd gan y Comisiynwyr Heddlu a Throseddu perthnasol yng Nghymru (y Comisiynwyr). Mae’r Comisiynwyr yn cadw rhestr o Bersonau â Chymwysterau Cyfreithiol ac Aelodau Panel Annibynnol ac yn eu penodi drwy ddefnyddio ‘proses y rhes cabiau’. Mae manylion y broses benodi sydd ar waith yng Nghymru i’w gweld ar waelod y dudalen hon (mae’r broses hon wrthi’n cael ei diwygio).

Tribiwnlysoedd Apeliadau’r Heddlu

Mae Tribiwnlysoedd Apeliadau’r Heddlu yn gwrando apeliadau yn erbyn canfyddiadau o gamymddwyn difrifol (mwyaf difrifol) gan swyddogion yr heddlu neu gwnstabliaid gwirfoddol. Caiff Tribiwnlysoedd Apeliadau’r Heddlu eu llywodraethu gan Reolau Tribiwnlysoedd Apeliadau’r Heddlu 2020. Gall aelodau o’r cyhoedd bellach fod yn bresennol mewn gwrandawiadau apelio fel arsylwyr ond ni chaniateir iddynt gymryd rhan yn y gweithrediadau; fodd bynnag, ceidw Cadeirydd y Tribiwnlys yr hawl i gynnal yr holl Dribiwnlys neu ran ohono yn breifat.

Mae Swyddfa Comisiynydd yr Heddlu a Throseddu De Cymru yn gyfrifol am hwyluso’r gwrandawiad sy’n cynnwys penodi’r Cadeirydd i gynnal y gweithrediadau. Caiff y Cadeirydd ei benodi o Gofrestr o Gadeiryddion sydd wedi’u Cymhwyso’n Gyfreithiol a gedwir gan y Swyddfa Gartref.